BLOGUES POLA LINGUA

BLOGUES POLA LINGUA celebra as Letras Galegas coa acción conxunta “Combater a ignorancia con poesía”

• Os 120 blogues adheridos a BpL escribirán mañá unha mesma entrada nas súas respectivas bitácoras cun poema de Celso Emilio Ferreiro.
• Kiko Da Silva, Manolo Bragado, Xabier P. Docampo e Marta Dacosta son as/os blogueiras/os máis coñecidos que forman parte de BpL.

Galiza, 16 de maio de 2008.- A Rede de Blogueiras/os en Defensa do Galego “Blogues pola Lingua” (BpL), xa ten 120 blogues adheridos apenas 48h após o seu nacemento. Por outra banda o blogue de BpL, www.bloguespolalingua.org está a piques de conseguir as 5.000 visitas.

Estos datos revelanse para as/os promotoras/es da iniciativa todo un éxito que xustifican en que “no blogomillo (a blogosfera galega) había moitas ganas de facer algo propio en defensa do galego” e sosteñen que “Blogues pola Lingua” vai ter continuidade máis aló da manifestación nacional do domingo 18 de maio.

Entre as/os blogueiras/os máis coñecidas/os que apoian BpL cabe destacar ao debuxante Kiko Da Silva, o director de Edicións Xerais, Manolo Bragado, e os escritores Xabier P. Docampo e Marta Dacosta.

Co gallo da celebración mañá sábado 17 de maio do Día das Letras Galegas, Blogues pola Lingua vai desenvolver unha acción denominada “Combater a ignorancia con poesía” que consistirá en que todos os blogues adheridos van escribir unha mesma entrada en cadansúa bitácora co poema de Celso Emilio Ferreiro “Deitado frente ó mar” (Longa Noite de Pedra).

Dende a comisión promotora da rede sinalan que “só da máis profunda e pobre das ignorancias pode nacer o auto-odio que vertebra o discurso que proclaman, envelenando, as/os que se din de lingua bífida” que pretenden contrarestar dun xeito orixinal co comprometido texto de Celso Emilio Ferreiro.

“Trátase de combater dunha maneira imaxinativa toda a campaña de despropósitos que estamos a presenciar en nome do bilingüismo” afirman.

===

(Texto da Nota de Prensa envíada a todos os meios de comunicación)

chuzame

Posted in Notas de Prensa | 1 Comment »

Acción 17-M: Combater a ignorancia con poesía.

Blogues pola Lingua pretende ser unha rede de acción, de feitos, en favor do noso idioma. Mañá celebramos o Día das Letras Galegas, data que ten sentido por server de homenaxe á nosa fala e á nosa escrita, pero que debemos vivir de maneira cotiá os 364 días que restan de ano.Precisamente o feito de poder vivirmos en galego con plena normalidade é o que se demanda este ano no manifesto d'A Mesa pola Normalización Lingüística ao que BpL estamos adheridas/os de maneira colectiva.

É evidente que só da máis profunda e pobre das ignorancias pode nacer o auto-odio que vertebra o discurso que proclaman, envelenando, as/os que se din de lingua bífida, e todos aqueles que sen tapuxos nen disimulo atacan ao noso idioma falando de imposicións ficticias e que din defender presuntas liberdades tralas que agochan o xugo da pretendida eliminación cultural, do medo á diferenza.

Por iso BpL propón a todos os blogues que se adheriron a esta Rede de Blogueiras/os en defensa do Galego, unha acción conxunta para mañá sábado 17 de maio: unha entrada simultánea en todas as bitácoras, que consiste no seguinte:

• Todas/os as/os blogueiras/os de BpL redactarán unha entrada en cadanseu blogue, baixo o título "Poesía contra a ignorancia" que conterá o texto completo do seguinte poema de Celso Emilio Ferreiro (Longa Noite de Pedra):

DEITADO FRENTE Ó MAR...

Lingua proletaria do meu pobo
eu faloa porque si, porque me gusta
porque me peta e quero e dame a gana
porque me sae de dentro, alá do fondo
dunha tristura aceda que me abrangue
ó ver tantos patufos desleigados,
pequenos mequetrefes sen raíces
que ó pór a garabata xa non saben
afirmarse no amor dos devanceiros,
fala-la fala nai,
a fala dos abós que temos mortos,
e ser, co rostro erguido,
mariñeiros, labregos da linguaxe,
remo e arado, proa e rella sempre.

Eu faloa porque si, porque me gusta
e quero estar cos meus, coa xente que sufren longo
unha historia contada noutra lingua.

Non falo prós soberbios,
non falo prós ruíns e poderosos,
non falo prós finchados,
non falo prós estupidos,
non falo prós valeiros,
que falo prós que aguantan rexamente
mentiras e inxusticias de cotío;
prós que súan e choran
un pranto cotián de volvoretas,
de lume e vento sobre os ollos núos.
Eu non podo arredar as miñas verbas de
tódolos que sufren neste mundo.
E ti vives no mundo, terra miña,
berce da miña estirpe,
Galicia, doce mágoa das Españas,
deitada rente ó mar, ise camiño...

chuzame

Posted in Accións | 4 Comments »

80 blogues adhírense a “BLOGUES POLA LINGUA” no seu primeiro día de andaina.

• O blogue de BpL recibiu nun só día preto de 2000 visitas.

• O popular debuxante Kiko Da Silva é un dos blogueiros que se adheriu a esta iniciativa en defensa do galego.

Galiza, 15 de maio de 2008.- Pasadas escasas vinte catro horas dende a apresentación pública da Rede de Blogueiras/os en Defensa do Galego “Blogues pola Lingua” (BpL), xa son 80 as bitácoras que se adheriron a esta iniciativa a prol do noso idioma, entre as que cabe destacar o blogue do debuxante Kiko Da Silva, e agardase que este número continúe aumentando de aquí ao domingo 18 de maio. 

A Comisión Promotora de BpL valora este feito como un indicador claro de que “esta iniciativa vai ter continuidade, porque o que fica patente é que era algo necesario, o blogomillo quería falar para defender con contundencia o noso idioma, e BpL é a canle desa expresión colectiva”. 

Outro dato positivo foi o número de visualizacións do blogue de BpL, www.bloguespolalingua.org, que onte estivo a piques de alcanzar as 2000 visitas. 

Dende BpL afirman que “este significativo movemento por parte do blogomillo é un síntoma de que a manifestación nacional do vindeiro domingo 18 de maio vai ser un rotundo éxito” que situará aos inimigos do galego “incluídos os que se fan chamar bilingües e que falan de imposicións ficticias” na “marxinalidade social que representan”.

APOIO AO MANIFESTO D’A MESA POLA NORMALIZACIÓN LINGÜÍSTICA
Por outra banda dende onte “Blogues pola Lingua” figura colectivamente como un dos apoiantes do Manifesto “Polo dereito a vivirmos en galego” de A Mesa pola Normalización Lingüística, o que supón que os 80 blogues que forman parte de BpL adhírense ao manifesto do colectivo a prol da normalización do galego. 

ACCIÓNS
A promotora de BpL sinala de que están barallando posíbeis accións en defensa do galego dende Internet. “Moitas/os das/os blogueiras/os nos están facendo chegar ideas, porque o que fica claro é que hai moitas ganas de facer cousas” indican.

===

(Texto da Nota de Prensa enviada a todos os meios de comunicación) 

chuzame

Posted in Notas de Prensa | 2 Comments »

Dominio propio: www.bloguespolalingua.org

Dende agora podese acceder aos contidos deste blogue tamén dende o dominio www.bloguespolalingua.org O aloxamento do mesmo continuará en Blogaliza.

Así mesmo, e estreando dominio ábrese o enderezo de correo electrónico correo@bloguespolalingua.org inda que a conta anterior (bloguespolalingua@gmail.com) seguirá en activo.

chuzame

Posted in Sobre nós | No Comments »

Nace “BLOGUES POLA LINGUA” a rede de blogueiras/os en defensa do Galego.

• Rexeitan os ataques que está a recibir o galego e apostan por estender o uso da lingua galega en Internet.
• Adhírense ao manifesto da Mesa pola Normalización Lingüística e chaman á participación na manifestación do vindeiro domingo 18 de maio en Compostela.

Galiza, 14 de maio de 2008.- No día de hoxe ven de apresentarse publicamente a Rede de Blogueiras/os en defensa do Galego. O colectivo baixo a denominación de “Blogues pola lingua” (BpL) está impulsado por un grupo promotor formado por seis autoras/es de blogues galegos.

O colectivo nace coa intención de defender e promover a lingua galega dende e na Rede, aproveitando as potencialidades da web 2.0 na que os blogues ocupan un papel destacado. “O nacemento de Blogues pola Lingua é un novo paso na liña do compromiso que ten o blogomillo co noso idioma” sinalan dende a comisión promotora. “Nun momento no que os ataques cara o galego non se disimulan, pensamos que era o intre de dar un paso adiante na defensa do idioma” recalcan.

A respecto da finalidade do colectivo explican que “Apostamos por estender o uso do galego na Rede para convertelo na lingua vehicular das galegas e dos galegos en Internet, conseguilo será un indicador da normalidade que unha inmensa maioría social reclamamos”.

A primeira acción de BpL foi a de lanzar dende o seu blogue (www.bloguespolalingua.blogaliza.org) un manifesto titulado “Na defensa do noso idioma”, e para o que agardan unha gran cantidade de adhesións nos vindeiros días, xa que a poucas horas do seu nacemento afirman ter recibido unha importante cantidade de correos electrónicos de blogueiras/os interesadas/os en apoiar esta iniciativa.

No manifesto indican que rexeitan todos os ataques ao galego especialmente “no caso de entidades que declarándose defensoras dun presunto, mais falaz, bilingüismo incorren en ser de facto unha manifestación do auto-odio”, din textualmente.

No texto chaman á cidadanía galega, e de maneira específica á mocidade, a participar o vindeiro 18 de maio na manifestación nacional convocada pola Mesa pola Normalización Lingüística. Así mesmo declaran tamén a súa adhesión colectiva ao Manifesto “Polo dereito a vivirmos en galego” de A Mesa pola Normalización Lingüística.

====

(Texto da nota de prensa envíada a todos os meios de comunicación)

chuzame

Posted in Notas de Prensa | 11 Comments »